ಊಟದ ಮಧ್ಯೆ ನೀರು ಕುಡಿಯುವುದರಿಂದ ಆಗುವ ಪ್ರಯೋಜನಗಳು: ಆಯುರ್ವೇದ ಹೆಲ್ತ್‌ ಟಿಪ್ಸ್‌

ಮಾನವ ದೇಹವು ಶೇಕಡಾ 71 ರಷ್ಟು ನೀರಿನಿಂದ ಕೂಡಿದ್ದು, ನೀರು (Water) ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಒದಗಿಸುತ್ತದೆ. ಚಯಾಪಚಯ ಕ್ರಿಯೆ (Metabolism), ಪರಿಸರ, ದೇಹದ ಗಾತ್ರ, ಲಿಂಗ ಮತ್ತು ದೈಹಿಕ ಶ್ರಮಕ್ಕೆ ಅನುಗುಣವಾಗಿ ನೀರಿನ ಅಗತ್ಯವು ವ್ಯಕ್ತಿಯಿಂದ ವ್ಯಕ್ತಿಗೆ ಬದಲಾಗುತ್ತದೆ. ಮತ್ತು ಇದು ವಾಸ್ತವವಾಗಿ ಕಡಿಮೆ ಪ್ರಮಾಣದಲ್ಲಿರುತ್ತದೆ.

ನೀರನ್ನು ಅಗತ್ಯಕ್ಕಿಂತ ಹೆಚ್ಚು ಸೇವಿಸಿದರೆ ಅಥವಾ ತೀರಾ ಕಡಿಮೆ ಸೇವಿಸಿದರೆ, ಆಹಾರವು ಸರಿಯಾಗಿ ಜೀರ್ಣವಾಗದೆ ಉಳಿಯುತ್ತದೆ. ಆದ್ದರಿಂದ, ಎಲ್ಲಾ ಸಂದರ್ಭಗಳಲ್ಲೂ ಅತಿಯಾದ ನೀರು ಸೇವನೆಯನ್ನು ಆಯುರ್ವೇದದಲ್ಲಿ ನಿಷೇಧಿಸಲಾಗಿದೆ. ಆಹಾರ ಸೇವನೆಯ ಸಮಯದಲ್ಲಿ ಜೀರ್ಣಾಗ್ನಿಯನ್ನು ಉತ್ತೇಜಿಸಲು ಅಲ್ಪ ಪ್ರಮಾಣದ ನೀರನ್ನು ಆಗಾಗ್ಗೆ ಕುಡಿಯುವುದು ಅವಶ್ಯಕ. ಬಾಯಾರಿಕೆಯಾದಾಗ ಆಹಾರವನ್ನು ಸೇವಿಸಬಾರದು ಮತ್ತು ಹಸಿವಾದಾಗ ನೀರನ್ನು ಕುಡಿಯಬಾರದು. ಹೀಗೆ ಮಾಡುವುದರಿಂದ ಹೊಟ್ಟೆಯಲ್ಲಿ ಗಡ್ಡೆ ಅಥವಾ ಊತ  ಅಥವಾ ಜಲೋದರದಂತಹ (Ascites) ಗಂಭೀರ ಸಮಸ್ಯೆಗಳು ಉಂಟಾಗಬಹುದು.

ಆಹಾರ ಮತ್ತು ನೀರಿನ ಸಂಬಂಧ

ಆಹಾರ ಸೇವನೆಗಿಂತ ಮೊದಲು ನೀರು ಕುಡಿಯುವುದು ಅಜೀರ್ಣಕ್ಕೆ ಕಾರಣವಾದರೆ, ಆಹಾರ ಸೇವಿಸಿದ ತಕ್ಷಣ ನೀರು ಕುಡಿಯುವುದು ಬೊಜ್ಜು ಅಥವಾ ಸ್ಥೂಲಕಾಯಕ್ಕೆ ದಾರಿ ಮಾಡಿಕೊಡುತ್ತದೆ. ಊಟದ ನಂತರ ತಣ್ಣೀರು ಕುಡಿಯುವುದರಿಂದ ಆಹಾರದಲ್ಲಿರುವ ಎಣ್ಣೆಯಂಶವು ಗಟ್ಟಿಯಾಗಿ, ಕರುಳಿನ ಒಳಭಾಗದಲ್ಲಿ ಕೊಬ್ಬು ಶೇಖರಣೆಯಾಗಲು ಕಾರಣವಾಗುತ್ತದೆ. ಅಷ್ಟೇ ಅಲ್ಲದೆ, ಊಟದ ನಂತರ ತಣ್ಣೀರು ಕುಡಿಯುವುದು ದೇಹದಲ್ಲಿ ಅತಿಯಾದ ಲೋಳೆ ಉತ್ಪತ್ತಿ ಮಾಡಿ ರೋಗನಿರೋಧಕ ಶಕ್ತಿಯನ್ನು ಕುಂಠಿತಗೊಳಿಸುತ್ತದೆ.

ಇದರಿಂದ ಶೀತ ಮತ್ತು ಇತರ ಕಾಯಿಲೆಗಳು ಬೇಗನೆ ಹರಡುತ್ತವೆ. ಆಹಾರದ ಮಧ್ಯದಲ್ಲಿ ಸ್ವಲ್ಪಸ್ವಲ್ಪವಾಗಿ (ಸಿಪ್-ಸಿಪ್) ನೀರನ್ನು ಕುಡಿಯುವುದು ದೇಹಕ್ಕೆ ಶಕ್ತಿ ಮತ್ತು ಬಲವನ್ನು ನೀಡಿ ಆರೋಗ್ಯವಾಗಿರಿಸುತ್ತದೆ.

ಊಟದ ಸಮಯದಲ್ಲಿ ಅಥವಾ ನಂತರ ತಣ್ಣನೆಯ ಪಾನೀಯಗಳನ್ನು ಕುಡಿಯುವುದರಿಂದ ದೇಹದ ಕೊಬ್ಬು ಗಟ್ಟಿಯಾಗುತ್ತದೆ. ಇದರಿಂದ ಅನಗತ್ಯ ಕೊಬ್ಬನ್ನು ಜೀರ್ಣಿಸಿಕೊಳ್ಳುವುದು ದೇಹಕ್ಕೆ ಕಷ್ಟವಾಗುತ್ತದೆ.

ಹಸಿವಿನ ಕೊರತೆಯಿದ್ದಾಗ ಉಗುರುಬೆಚ್ಚಗಿನ ನೀರು ಔಷಧಿಯಂತೆ ಕೆಲಸ ಮಾಡುತ್ತದೆ. ಬಿಸಿ ನೀರು ಜೀರ್ಣಕ್ರಿಯೆಗೆ ಅತ್ಯಂತ ಪ್ರಯೋಜನಕಾರಿ. ಇದು ಜೀರ್ಣಕಾರಿ ಗ್ರಂಥಿಗಳನ್ನು ಉತ್ತೇಜಿಸಿ, ಪೋಷಕಾಂಶಗಳ ಹೀರಿಕೊಳ್ಳುವಿಕೆಗೆ ಮತ್ತು ಮಲವಿಸರ್ಜನೆಯ ನಿಯಂತ್ರಣಕ್ಕೆ ಸಹಾಯ ಮಾಡುತ್ತದೆ. ಆಹಾರ ಜೀರ್ಣವಾದ ನಂತರ ನೀರು ಕುಡಿಯುವುದು ದೇಹಕ್ಕೆ ಚೈತನ್ಯ ನೀಡುತ್ತದೆ.

ಊಟದ ಮಧ್ಯದಲ್ಲಿ ಕುಡಿಯುವ ನೀರು ಅಮೃತಕ್ಕೆ ಸಮಾನವಾದರೆ. ರಾತ್ರಿ ಸಮಯದಲ್ಲಿ ಅತಿಯಾಗಿ ನೀರು ಕುಡಿಯುವುದು ದೇಹದ ಮೇಲೆ ವಿಷಕಾರಿ ಪರಿಣಾಮ ಬೀರಬಹುದು. ಆದ್ದರಿಂದ, ಊಟವಾದ ಒಂದು ಗಂಟೆಯ ನಂತರ ನೀರು ಕುಡಿಯುವುದು ಅಥವಾ ಊಟದ ಮಧ್ಯದಲ್ಲಿ ಸ್ವಲ್ಪಸ್ವಲ್ಪವಾಗಿ ನೀರು ಕುಡಿಯುವುದು ಉತ್ತಮ ಎಂದು ಸಲಹೆ ನೀಡಲಾಗುತ್ತದೆ.

ಋತುಮಾನಕ್ಕನುಗುಣವಾಗಿ ನೀರು ಸೇವನೆಯ ಮಹತ್ವ

ಹವಾಮಾನದ ಬದಲಾವಣೆಗಳು ದೇಹದ ಜೀರ್ಣಾಗ್ನಿಯ ಮೇಲೆ ಪ್ರಭಾವ ಬೀರುವುದರಿಂದ ಜೀರ್ಣಕ್ರಿಯೆಯು ಋತುಮಾನಕ್ಕೆ ತಕ್ಕಂತೆ ವ್ಯತ್ಯಾಸಗೊಳ್ಳುತ್ತದೆ. ನೀರನ್ನು ಹೆಚ್ಚು ಸಮಯ ಕುದಿಸಿದಷ್ಟೂ ಅಥವಾ ಅದರ ಮೂಲ ಪ್ರಮಾಣವು 1/2, 1/4 ಅಥವಾ 1/8 ಭಾಗಕ್ಕೆ ಇಳಿಯುವವರೆಗೆ ಬಿಸಿ ಮಾಡಿದಷ್ಟೂ ಅದು ಜೀರ್ಣಕ್ಕೆ ಹಗುರವಾಗುತ್ತದೆ. ಮಳೆಗಾಲದಲ್ಲಿ  ಜೀರ್ಣಾಗ್ನಿಯು ಅತ್ಯಂತ ಕ್ಷೀಣವಾಗಿರುವುದರಿಂದ, ನೀರನ್ನು ಅದರ ಮೂಲ ಪ್ರಮಾಣದ 1/8 ಭಾಗದಷ್ಟು ಬರುವವರೆಗೆ ಕುದಿಸಿ ಬಳಸಲು ಸೂಚಿಸಲಾಗಿದೆ.

ಹೇಮಂತ, ವಸಂತ ಮತ್ತು ಶಿಶಿರ ಋತುಗಳಲ್ಲಿ (ನವೆಂಬರ್ – ಜನವರಿ) 1/4 ಭಾಗದಷ್ಟು ಬರುವವರೆಗೆ ಕುದಿಸಿದ ನೀರನ್ನು ಸೇವಿಸಬೇಕು. ಇನ್ನು ಬೇಸಿಗೆಯಲ್ಲಿ (ಗ್ರೀಷ್ಮ ಋತು) 1/2 ಭಾಗದಷ್ಟು ಕುದಿಸಿದ ನೀರು ಸಾಕಾಗುತ್ತದೆ. ಗ್ರೀಷ್ಮ ಮತ್ತು ಶರದೃತುಗಳಲ್ಲಿ ಅತಿಯಾದ ಬಿಸಿಲಿನಿಂದಾಗಿ ದೇಹವು ಬೇಗನೆ ನಿರ್ಜಲೀಕರಣಕ್ಕೆ (Dehydration) ಒಳಗಾಗುವುದರಿಂದ, ಈ ಸಮಯದಲ್ಲಿ ಬಾಯಾರಿಕೆಗೆ ಅನುಗುಣವಾಗಿ ಸಾಕಷ್ಟು ನೀರು ಕುಡಿಯಲು ಸಲಹೆ ನೀಡಲಾಗಿದೆ.

ಇದಕ್ಕೆ ವಿರುದ್ಧವಾಗಿ, ಇತರ ಋತುಗಳಲ್ಲಿ ನಿರ್ಜಲೀಕರಣ ಕಡಿಮೆ ಇರುವುದರಿಂದ ಮಿತವಾಗಿ ನೀರು ಕುಡಿಯಬೇಕು. ಆಧುನಿಕ ವಿಜ್ಞಾನದ ಪ್ರಕಾರ, ಚಳಿಗಾಲದಲ್ಲಿ ಬಿಸಿ ನೀರನ್ನು ಸೇವಿಸುವುದು ಕರುಳಿನ ಸೂಕ್ಷ್ಮಜೀವಿಗಳ (Gut microbiota) ಮೇಲೆ ಸಕಾರಾತ್ಮಕ ಪರಿಣಾಮ ಬೀರುತ್ತದೆ ಎಂದು ಸಂಶೋಧನೆಗಳು ತಿಳಿಸುತ್ತವೆ

ವ್ಯಕ್ತಿಯು ತನ್ನ ಬಾಯಾರಿಕೆಗೆ ಅನುಗುಣವಾಗಿ ಮುಂಜಾನೆ ಖಾಲಿ ಹೊಟ್ಟೆಯಲ್ಲಿ ನೀರನ್ನು ಕುಡಿಯಬೇಕು. ಋತುಮಾನಕ್ಕೆ ಅನುಗುಣವಾಗಿ ನೀರಿನ ಸೇವನೆಯಲ್ಲಿ ಬದಲಾವಣೆ ಮಾಡಿಕೊಳ್ಳುವುದರಿಂದ ಕಾಲೋಚಿತ ಸೋಂಕುಗಳನ್ನು ತಡೆಗಟ್ಟಬಹುದು. ಆಹಾರದ ಮಧ್ಯದಲ್ಲಿ ನೀರು ಕುಡಿಯುವುದು ದೇಹದ ಶಕ್ತಿ ಮತ್ತು ಬಲವನ್ನು ಹೆಚ್ಚಿಸುವುದಲ್ಲದೆ, ಅಜೀರ್ಣ ಮತ್ತು ಬೊಜ್ಜನ್ನು ತಡೆಯಲು ಸಹಕಾರಿಯಾಗಿದೆ.

ರಕ್ತಪರಿಚಲನೆಯನ್ನು ಸುಗಮಗೊಳಿಸಲು ತಾಮ್ರದ ಪಾತ್ರೆಗಳಲ್ಲಿ ನೀರನ್ನು ಶೇಖರಿಸಿ ಬಳಸುವುದು ಉತ್ತಮ. ನೀರನ್ನು ಅತಿಯಾಗಿ ಅಥವಾ ತೀರಾ ಕಡಿಮೆ ಪ್ರಮಾಣದಲ್ಲಿ ಕುಡಿಯಬಾರದು; ಬಾಯಾರಿಕೆಗೆ ತಕ್ಕಂತೆ ಹಿತಮಿತವಾಗಿ ಸೇವಿಸಬೇಕು. ಅನಾರೋಗ್ಯದ ಸಂದರ್ಭದಲ್ಲಿ ಬೇಗ ಗುಣಮುಖರಾಗಲು ಔಷಧೀಯ ನೀರನ್ನು (ಸಿದ್ಧ ಜಲ) ಬಳಸಬೇಕು. ಇನ್ನು ಕ್ರೀಡಾಪಟುಗಳು ವ್ಯಾಯಾಮ ಮುಗಿಸಿದ 30 ನಿಮಿಷಗಳ ನಂತರ ದ್ರವ ಪದಾರ್ಥಗಳನ್ನು ಸೇವಿಸುವುದು ಸೂಕ್ತ.

ಮತ್ತುಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ