ಗರ್ಭಕೋಶ ಕ್ಯಾನ್ಸರ್ ತಡೆಯಲು ಕೇಂದ್ರದಿಂದ ಬಾಲಕಿಯರಿಗೆ ಉಚಿತ HPV ಲಸಿಕೆ

ನವದೆಹಲಿ, ಮಾ.02: ಭಾರತದಲ್ಲಿ ಮಹಿಳೆಯರ ಆರೋಗ್ಯ ರಕ್ಷಣೆಗಾಗಿ ಮಹತ್ವದ ಹೆಜ್ಜೆಯಾಗಿ ಕೇಂದ್ರ ಸರ್ಕಾರ (Union Government) ಹೆಚ್‌ಪಿವಿ (HPV) ಲಸಿಕಾ ಕಾರ್ಯಕ್ರಮಕ್ಕೆ ದೇಶವ್ಯಾಪಿ ಚಾಲನೆ ನೀಡಿದೆ. ಈ ಯೋಜನೆಯ ಪ್ರಮುಖ ಉದ್ದೇಶ ಗರ್ಭಕೋಶ ಕ್ಯಾನ್ಸರ್‌ನ್ನು (Cervical Cancer) ತಡೆಗಟ್ಟುವುದಾಗಿದೆ. ಆರಂಭಿಕ ಹಂತದಲ್ಲಿ 14 ವರ್ಷದ ಬಾಲಕಿಯರಿಗೆ ಉಚಿತವಾಗಿ ಲಸಿಕೆಯನ್ನು ನೀಡಲಾಗುತ್ತದೆ. ವಿಶೇಷ ಅವಧಿಯಲ್ಲಿ 15 ವರ್ಷ ಪೂರೈಸುವವರಿಗೂ ಲಸಿಕೆ ನೀಡಲಾಗುತ್ತದೆ.

ಗರ್ಭಕೋಶ ಕ್ಯಾನ್ಸರ್ ಗಂಭೀರ ಆದರೆ ತಡೆಗಟ್ಟಬಹುದು

ಗರ್ಭಕೋಶ ಕ್ಯಾನ್ಸರ್ ಮಹಿಳೆಯರಲ್ಲಿ ಕಾಣಿಸಿಕೊಳ್ಳುವ ಪ್ರಮುಖ ಕ್ಯಾನ್ಸರ್‌ಗಳಲ್ಲಿ ಒಂದಾಗಿದೆ. ಜಾಗತಿಕ ಮಟ್ಟದಲ್ಲಿ ಇದು ಮಹಿಳೆಯರಲ್ಲಿ ನಾಲ್ಕನೇ ಅತಿ ಸಾಮಾನ್ಯ ಕ್ಯಾನ್ಸರ್ ಎಂದು ಪರಿಗಣಿಸಲಾಗಿದೆ. ಭಾರತದಲ್ಲಿಯೂ ಇದರ ಪ್ರಮಾಣ ಗಮನಾರ್ಹವಾಗಿದ್ದು, ಪ್ರತಿವರ್ಷ ಸಾವಿರಾರು ಮಹಿಳೆಯರು ಈ ರೋಗದಿಂದ ಬಳಲುತ್ತಾರೆ.

ಈ ಕ್ಯಾನ್ಸರ್ ಮಾನವ ಪ್ಯಾಪಿಲೋಮಾ ವೈರಸ್‌ (HPV) ಸೋಂಕಿನಿಂದ ಉಂಟಾಗುತ್ತದೆ. ವಿಶೇಷವಾಗಿ HPV 16 ಮತ್ತು18 ಪ್ರಭೇದಗಳು ಹೆಚ್ಚಿನ ಪ್ರಕರಣಗಳಿಗೆ ಕಾರಣವಾಗುತ್ತವೆ. ಆದರೆ, ಸಮಯಕ್ಕೆ ಸರಿಯಾಗಿ ಲಸಿಕೆ ನೀಡಿದರೆ ಈ ರೋಗವನ್ನು ಸಂಪೂರ್ಣವಾಗಿ ತಡೆಗಟ್ಟಬಹುದು ಎಂಬುದು ವೈದ್ಯಕೀಯ ಸಂಶೋಧನೆಗಳಿಂದ ಸಾಬೀತಾಗಿದೆ.

ಲಸಿಕೆಯ ವಿಶೇಷತೆ

ಹೆಚ್‌ಪಿವಿ ಲಸಿಕೆ ನಾಲ್ಕು ಪ್ರಮುಖ ವೈರಸ್ ಪ್ರಭೇದಗಳಿಂದ ರಕ್ಷಣೆ ನೀಡುತ್ತದೆ. ಇದು ಗರ್ಭಕೋಶ ಕ್ಯಾನ್ಸರ್ ಉಂಟುಮಾಡುವ ವೈರಸ್‌ಗಳ ವಿರುದ್ಧ ಪರಿಣಾಮಕಾರಿ ರಕ್ಷಣೆಯನ್ನು ಒದಗಿಸುತ್ತದೆ.

ಲಸಿಕೆಯ ಖರೀದಿ, ಸಂಗ್ರಹಣೆ ಮತ್ತು ವಿತರಣೆಯನ್ನು ಕಟ್ಟುನಿಟ್ಟಿನ ಗುಣಮಟ್ಟದ ಮಾನದಂಡಗಳಡಿ ನಡೆಸಲಾಗುತ್ತಿದೆ. ಶೀತ ಸರಪಳಿ ವ್ಯವಸ್ಥೆ (Cold Chain) ಮೂಲಕ ಲಸಿಕೆಯ ಪರಿಣಾಮಕಾರಿತ್ವವನ್ನು ಕಾಪಾಡಲಾಗುತ್ತದೆ.

ಇದನ್ನೂ ಓದಿ: AI ಪ್ರಭಾವ: ಇನ್ಮುಂದೆ 15 ದಿನ ಮೊದಲೇ ಗೊತ್ತಾಗಿಬಿಡತ್ತೆ ಚಂಡಮಾರುತ, ಭೂಕುಸಿತ, ಪ್ರವಾಹ ಮಾಹಿತಿ!

ಈ ಅಭಿಯಾನದಲ್ಲಿ Gardasil-4 ಲಸಿಕೆಯನ್ನು ಬಳಸಲಾಗುತ್ತಿದೆ. ಇದು HPV ವಿಧಗಳು 16 ಮತ್ತು18 ರಿಂದ ರಕ್ಷಣೆ ನೀಡುವುದರ ಜೊತೆಗೆ 6 ಮತ್ತು11 ಪ್ರಭೇದಗಳ ವಿರುದ್ಧವೂ ಹೋರಾಡುವ ಪರಿಣಾಮಕಾರಿ ಲಸಿಕೆಯಾಗಿದೆ. ಈ ಲಸಿಕೆ ಭಾರತದ ಔಷಧ ನಿಯಂತ್ರಣ ಸಂಸ್ಥೆಯಿಂದ ಅನುಮೋದಿತವಾಗಿದೆ. ಲಸಿಕೆ ಖರೀದಿ ಮತ್ತು ಪೂರೈಕೆ ಪ್ರಕ್ರಿಯೆ ಪಾರದರ್ಶಕವಾಗಿದ್ದು, ಜಾಗತಿಕ ಲಸಿಕೆ ಒಕ್ಕೂಟ GAVIಯ ಸಹಕಾರದ ಮೂಲಕ ನಡೆಯುತ್ತಿದೆ.

ಲಸಿಕೆ ಎಲ್ಲಿ ನೀಡಲಾಗುತ್ತದೆ

ಲಸಿಕೆಗಳನ್ನು ಸರ್ಕಾರದ ಮಾನ್ಯತೆ ಪಡೆದ ಆರೋಗ್ಯ ಕೇಂದ್ರಗಳಲ್ಲಿ ಮಾತ್ರ ನೀಡಲಾಗುತ್ತದೆ. ಅಡ್ಡ ಪರಿಣಾಮಗಳ ನಿರ್ವಹಣೆಗೆ ವೈದ್ಯಕೀಯ ಸಿಬ್ಬಂದಿಗಳಿರುತ್ತಾರೆ.

ಲಸಿಕೆ ಹೇಗೆ ಪಡೆಯಬೇಕು

ಲಸಿಕೆ ಪಡೆಯುವವರು ಖಾಲಿ ಹೊಟ್ಟೆಯಲ್ಲಿ ಲಸಿಕೆಯನ್ನು ತೆಗೆದುಕೊಳ್ಳಬಾರದೆಂದು ಸಲಹೆ ನೀಡಲಾಗಿದೆ. ಲಸಿಕೆ ನೀಡಿದ ನಂತರ ಕನಿಷ್ಠ 30 ನಿಮಿಷಗಳ ಅವಲೋಕನ (ಕಡ್ಡಾಯವಾಗಿದೆ. ತುರ್ತು ಪರಿಸ್ಥಿತಿಗಳಲ್ಲಿ ಸಮೀಪದ 24×7 ಆರೋಗ್ಯ ಕೇಂದ್ರವನ್ನು ಸಂಪರ್ಕಿಸಬಹುದಾಗಿದೆ ಎಂದು ಕೇಂದ್ರ ಸರ್ಕಾರ ಪ್ರಕಟಣೆಯಲ್ಲಿ ತಿಳಿಸಿದೆ.

ಲಸಿಕೆ ಪಡೆಯಲು ನೋಂದಣಿ ಕಡ್ಡಾಯ

ಲಸಿಕೆ ಪಡೆಯುವವರು ಡಿಜಿಟಲ್ ಪ್ಲಾಟ್‌ಫಾರಂಗಳ ಮೂಲಕ ನೋಂದಣಿ ಮಾಡಿಕೊಳ್ಳಬೇಕು. ಆರೋಗ್ಯ ಕಾರ್ಯಕರ್ತರ ಸಹಾಯದಿಂದಲೂ ನೋಂದಣಿ ಮಾಡಿಕೊಳ್ಳಬಹುದು. ಲಸಿಕೆ ಪಡೆದ ನಂತರ ಡಿಜಿಟಲ್ ಪ್ರಮಾಣಪತ್ರ ನೀಡಲಾಗುತ್ತದೆ. ಲಸಿಕೆಯ ಸಂಗ್ರಹ ಮತ್ತು ಲಾಜಿಸ್ಟಿಕ್ಸ್ ವ್ಯವಸ್ಥೆಯನ್ನು ತಂತ್ರಜ್ಞಾನಾಧಾರಿತ ವ್ಯವಸ್ಥೆಗಳ ಮೂಲಕ ನಿರ್ವಹಿಸಲಾಗುತ್ತದೆ ಎಂದು ಸರ್ಕಾರ ತಿಳಿಸಿದೆ.

ಯಾರು ಲಸಿಕೆ ಪಡೆಯಬಾರದು?

1. ತೀವ್ರ ಅಸ್ವಸ್ಥತೆಯಿರುವವರು (ಪೂರ್ಣ ಗುಣಮುವಾದ ನಂತರ ಮಾತ್ರ ಲಸಿಕೆ ಪಡೆಯಬೇಕು)
2. ಗಂಭೀರ ಅಲರ್ಜಿ ಇರುವವರು
3. ಗರ್ಭಿಣಿಯರು
4. ವಯೋಮಾನದ ಹೊರಗಿನವರು
5. ಈಗಾಗಲೇ HPV ಲಸಿಕೆ ಪಡೆದವರು

ಸಮಾಜದ ಆರೋಗ್ಯದತ್ತ ದೊಡ್ಡ ಹೆಜ್ಜೆ

ಹೆಚ್‌ಪಿವಿ ಲಸಿಕೆ ಜಗತ್ತಿನ ಅತ್ಯಂತ ಅಧ್ಯಯನಗೊಂಡ ಲಸಿಕೆಗಳಲ್ಲಿ ಒಂದಾಗಿದೆ. ವಿಶ್ವದ ಅನೇಕ ದೇಶಗಳು ಇದನ್ನು ತಮ್ಮ ರಾಷ್ಟ್ರೀಯ ಲಸಿಕಾ ಯೋಜನೆಯಲ್ಲಿ ಸೇರಿಸಿಕೊಂಡಿವೆ.

ಈ ದೇಶವ್ಯಾಪಿ ಅಭಿಯಾನವು ಕೇವಲ ಲಸಿಕೆ ನೀಡುವ ಕಾರ್ಯಕ್ರಮವಲ್ಲ, ಇದು ಮಹಿಳೆಯರ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸುವ ಸಾಮಾಜಿಕ ಚಳುವಳಿಯಾಗಿದೆ. ಆರೋಗ್ಯಕರ ಮಹಿಳೆ ಎಂದರೆ ಆರೋಗ್ಯಕರ ಕುಟುಂಬ, ಆರೋಗ್ಯಕರ ಸಮಾಜವಾಗಿದೆ.

ಗರ್ಭಕೋಶ ಕ್ಯಾನ್ಸರ್‌ನ್ನು ತಡೆಗಟ್ಟಲು ಲಸಿಕೆ, ಸಮಯೋಚಿತ ತಪಾಸಣೆ ಮತ್ತು ಆರೋಗ್ಯ ಜಾಗೃತಿ ಈ ಮೂರು ಪ್ರಮುಖ ಅಂಶಗಳು ಅವಶ್ಯಕವಾಗಿದೆ. ಈ ಮಹತ್ವದ ಯೋಜನೆ ಭವಿಷ್ಯದ ತಲೆಮಾರಿನ ಮಹಿಳೆಯರನ್ನು ರಕ್ಷಿಸುವತ್ತ ಒಂದು ದೃಢವಾದ ಹೆಜ್ಜೆಯಾಗಿದೆ.