ದಾವಣಗೆರೆ-ಚಿತ್ರದುರ್ಗ, ಗದಗ–ವಾಡಿ ರೈಲು ಮಾರ್ಗ 2027ಕ್ಕೆ ಪೂರ್ಣ: ಸೋಮಣ್ಣ

ದಾವಣಗೆರೆ/ಚಿತ್ರದುರ್ಗ ಫೆ.27: ದಾವಣಗೆರೆ ಮತ್ತು ಚಿತ್ರದುರ್ಗ (Davangere-Chitradurga) ನಡುವಿನ ನೇರ ರೈಲು ಮಾರ್ಗವು 2027ರ ಜೂನ್ ಅಂತ್ಯದೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದ್ದು, ಕಾಮಗಾರಿಯನ್ನು ವೇಗಗೊಳಿಸಲು ಗುತ್ತಿಗೆದಾರರಿಗೆ ಕೇಂದ್ರ ರೈಲ್ವೆ ರಾಜ್ಯ ಸಚಿವ ವಿ. ಸೋಮಣ್ಣ (V Somanna) ಸೂಚನೆ ನೀಡಿದರು.

ಕೇಂದ್ರ ರೈಲ್ವೆ ರಾಜ್ಯ ಸಚಿವ ವಿ. ಸೋಮಣ್ಣ ಅವರು ತೋಳಹುಣಸೆ–ಭರಮಸಾಗರ  ನಡುವಿನ ಹೊಸ ರೈಲು ಮಾರ್ಗದ ಕಾಮಗಾರಿಯನ್ನು ಪರಿಶೀಲಿಸಿದರು. ಬಳಿಕ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು,  ದಾವಣಗೆರೆ–ಚಿತ್ರದುರ್ಗ–ತುಮಕೂರು, ರಾಯದುರ್ಗ–ತುಮಕೂರು ಹಾಗೂ ಗದಗ–ವಾಡಿ ಸೇರಿದಂತೆ ಹಲವಾರು ಮಾರ್ಗಗಳನ್ನು 2027ರ ಡಿಸೆಂಬರ್ ಅಂತ್ಯದೊಳಗೆ ಪೂರ್ಣಗೊಳಿಸಿ ಸಾರ್ವಜನಿಕ ಸೇವೆಗೆ ತೆರೆಯುವ ಯೋಜನೆ ಇದೆ ಎಂದು ತಿಳಿಸಿದರು ಎಂದು ಖಾಸಗಿ ಸುದ್ದಿ ಸಂಸ್ಥೆ ಟೈಮ್ಸ್‌ ಆಫ್‌ ಇಂಡಿಯಾ ವರದಿ ಮಾಡಿದೆ.

ಚಿತ್ರದುರ್ಗ ತಾಲೂಕಿನ ಭರಮಸಾಗರ ಹೋಬಳಿಯ ಹಂಪನೂರು ಗ್ರಾಮದ ಬಳಿ ನಡೆಯುತ್ತಿರುವ ಕಾಮಗಾರಿಯ ಪ್ರಗತಿಯನ್ನು ಪರಿಶೀಲಿಸಿದ ಬಳಿಕ ಸಚಿವರು ಅಸಮಾಧಾನ ವ್ಯಕ್ತಪಡಿಸಿದರು. “ಇಲ್ಲಿಯವರೆಗೆ ಕೇವಲ ಶೇ 8 ರಿಂದ 9 ವರೆಗೆ ಪ್ರಗತಿ ಮಾತ್ರ ಕಾಮಗಾರಿ ಪೂರ್ಣಗೊಂಡಿದೆ. 2027ರ ಜನವರಿಯೊಳಗೆ ಭರಮಸಾಗರದವರೆಗೆ ಹಾಗೂ ಜೂನ್ ಒಳಗೆ ಚಿತ್ರದುರ್ಗದವರೆಗೆ ಮಾರ್ಗ ಪೂರ್ಣಗೊಳಿಸಿ ಎಂದು ಅಧಿಕಾರಿಗಳಿಗೆ ಹೇಳಿದರು.

ಈ ಮಾರ್ಗ ಆರಂಭವಾದರೆ ಮಧ್ಯ ಕರ್ನಾಟಕದ ಜಿಲ್ಲೆಗಳಲ್ಲಿ ಆರ್ಥಿಕ ಮತ್ತು ಕೈಗಾರಿಕಾ ಅಭಿವೃದ್ಧಿಗೆ ಉತ್ತೇಜನ ಸಿಗಲಿದೆ. ಪ್ರತಿ ತಿಂಗಳು ವಿಡಿಯೋ ಕಾನ್ಫರೆನ್ಸ್ ಮೂಲಕ ಕಾಮಗಾರಿಯ ಪ್ರಗತಿಯನ್ನು ಪರಿಶೀಲಿಸುವುದಾಗಿ ತಿಳಿಸಿದರು.

ಭೂಸ್ವಾಧೀನ ಪ್ರಕ್ರಿಯೆಯನ್ನು ಶೀಘ್ರ ಪೂರ್ಣಗೊಳಿಸಲು ವಿಶೇಷ ಭೂಸ್ವಾಧೀನಾಧಿಕಾರಿಗೆ ಸೂಚನೆ ನೀಡಿದ ಸಚಿವರು. ಭರಮಸಾಗರ–ಚಿತ್ರದುರ್ಗ ನಡುವಿನ 28 ಕಿಮೀ ಮಾರ್ಗದಲ್ಲಿ ಯಾವುದೇ ಭೂಸ್ವಾಧೀನ ಬಾಕಿ ಉಳಿಯಬಾರದು ಎಂದು ಹೇಳಿದರು. ಸಣ್ಣಪುಟ್ಟ ಸಮಸ್ಯೆಗಳನ್ನು ತಕ್ಷಣ ಪರಿಹರಿಸಿ ಅನಗತ್ಯ ವಿಳಂಬ ತಪ್ಪಿಸಬೇಕು ಎಂದು ನಿರ್ದೇಶಿಸಿದರು.

ದಾವಣಗೆರೆಯಲ್ಲಿ ನೇರ ರೈಲು ಮಾರ್ಗದ ಕಾಮಗಾರಿ ವೇಗವಾಗಿ ಸಾಗುತ್ತಿದ್ದು, ಹೆಬ್ಬಾಳು ಗ್ರಾಮದವರೆಗೆ ಹಳಿ ಅಳವಡಿಕೆ ಪೂರ್ಣಗೊಂಡಿದೆ. ಜುಲೈ ತಿಂಗಳಿಂದ ತೊಳಹುನಸೆ ಮತ್ತು ಆನಗೋಡು ನಡುವೆ ಪ್ರಯಾಣಿಕರ ರೈಲು ಓಡಿಸುವ ಯೋಜನೆ ಇದೆ ಎಂದು ಸಚಿವರು ತಿಳಿಸಿದರು.

ಆನಗೋಡು ರೈಲು ನಿಲ್ದಾಣದಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡಿದ ಅವರು, “2027ರ ಡಿಸೆಂಬರ್ ಒಳಗೆ ನೇರ ರೈಲು ಮಾರ್ಗ ಸಂಪೂರ್ಣ ಕಾರ್ಯಾರಂಭಗೊಳ್ಳಲಿದೆ. ಈಗಾಗಲೇ ನಿರ್ಮಾಣವಾದ ಹಳಿಗಳಲ್ಲಿ ರೈಲು ಓಡಿಸದಿದ್ದರೆ ತಾಂತ್ರಿಕ ಸಮಸ್ಯೆಗಳು ಉಂಟಾಗಬಹುದು. ಪೂರ್ಣಗೊಂಡ ಪ್ರಮುಖ ವಿಭಾಗಗಳ ನಡುವೆ ಪ್ರತಿ 20 ಕಿಮೀಗೆ ಒಂದು ಪ್ರಯಾಣಿಕರ ರೈಲು ಓಡಿಸಲಾಗುತ್ತದೆ,” ಎಂದರು.

ರೈಲ್ವೆ ಇಲಾಖೆಯ ತಾಂತ್ರಿಕ ತಜ್ಞರ ತಂಡ ಹಳಿಗಳನ್ನು ಪರಿಶೀಲಿಸಿ ಬಳಿಕ ರೈಲು ಸಂಚಾರದ ಬಗ್ಗೆ ಅಂತಿಮ ತೀರ್ಮಾನ ಕೈಗೊಳ್ಳಲಿದೆ. ಹೊಸದಾಗಿ ನಿರ್ಮಿಸಿದ ರೈಲು ನಿಲ್ದಾಣಗಳ ನಿರ್ವಹಣೆ ದೊಡ್ಡ ಸವಾಲಾಗಿದೆ. ರಾತ್ರಿ ವೇಳೆ ಅನಧಿಕೃತ ಚಟುವಟಿಕೆಗಳನ್ನು ತಡೆಯುವುದು ರೈಲ್ವೆ ರಕ್ಷಣಾ ಪಡೆ (RPF) ಜವಾಬ್ದಾರಿಯಾಗಿದ್ದು, ಸ್ಥಳೀಯ ಪೊಲೀಸರು ಸಹ ಸಹಕಾರ ನೀಡಬೇಕು ಎಂದು ಸಚಿವರು ಹೇಳಿದರು.

ಮತ್ತುಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ