ಭಾರತ 6 ವರ್ಷಗಳಲ್ಲಿ 38 ದೇಶಗಳನ್ನು ಒಳಗೊಂಡ 9 FTA ಒಪ್ಪಂದ

ನವದೆಹಲಿ, ಮೇ 01: ಭಾರತ-ನ್ಯೂಜಿಲೆಂಡ್ ದೇಶಗಳು ಸೋಮವಾರ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (FTA) ಸಹಿ ಹಾಕಿದವು. ಹೊಸ ರಫ್ತು ಮಾರುಕಟ್ಟೆಗಳನ್ನು ತೆರೆಯುವ ಮತ್ತು ವ್ಯಾಪಾರ ನಿಯಮಗಳನ್ನು ಸರಾಗಗೊಳಿಸುವ ಮಹತ್ವದ ಕ್ರಮದಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (FTA) ಸಹಿ ಹಾಕಿದವು. ಇದು ಎಲ್ಲಾ ಟ್ಯಾರಿಫ್ ವಿಭಾಗಗಳನ್ನು ಒಳಗೊಂಡಿದ್ದು, ಸಣ್ಣ, ಮಧ್ಯಮ ಮತ್ತು ಸೂಕ್ಷ್ಮ ಕೈಗಾರಿಕೆಗಳು (MSMEಗಳು) ಹಾಗೂ ಉದ್ಯೋಗಾವಕಾಶಗಳಿಗೆ ಮಹತ್ವದ ಉತ್ತೇಜನ ನೀಡಲಿದೆ.

ಭಾರತ ಸರ್ಕಾರವು ಕಳೆದ 6 ವರ್ಷಗಳಲ್ಲಿ ಒಟ್ಟು 38 ದೇಶಗಳನ್ನು ಒಳಗೊಂಡ 9 ಎಫ್‌ಟಿಎ ಒಪ್ಪಂದ ಮಾಡಿಕೊಂಡಿದೆ. 2021ರ ಫೆಬ್ರವರಿಯಲ್ಲಿ ಭಾರತ-ಮಾರಿಷಸ್ ಸಮಗ್ರ ಆರ್ಥಿಕ ಸಹಕಾರ ಮತ್ತು ಪಾಲುದಾರಿಕೆ ಒಪ್ಪಂದ (CECPA) ಆಯಿತು. ಇದು ಆಫ್ರಿಕಾ ಖಂಡದ ರಾಷ್ಟ್ರದೊಂದಿಗೆ ಭಾರತ ಮಾಡಿಕೊಂಡ ಮೊದಲ ಐತಿಹಾಸಿಕ ವ್ಯಾಪಾರ ಒಪ್ಪಂದವಾಗಿದೆ.

ಅದಾದ ಬಳಿಕ 2022ರ ಮೇ ತಿಂಗಳಲ್ಲಿ ಭಾರತ-ಯುಎಇ ಸಮಗ್ರ ಆರ್ಥಿಕ ಪಾಲುದಾರಿಕೆ ಒಪ್ಪಂದ (CEPA) ಮಾಡಿಕೊಂಡಿತು. ಐದು ವರ್ಷಗಳಲ್ಲಿ ದ್ವಿಪಕ್ಷೀಯ ವ್ಯಾಪಾರವನ್ನು 100 ಬಿಲಿಯನ್ ಡಾಲರ್ ಮಟ್ಟಕ್ಕೆ ಏರಿಸುವ ಗುರಿಯೊಂದಿಗೆ, ಈ ಒಪ್ಪಂದವು 80 ಪ್ರತಿಶತಕ್ಕೂ ಹೆಚ್ಚು ವಸ್ತುಗಳ ಮೇಲಿನ ಸುಂಕಗಳನ್ನು ರದ್ದುಪಡಿಸಿತು ಅಥವಾ ಕಡಿತಗೊಳಿಸಿತು.

2022ರ ಡಿಸೆಂಬರ್‌ನಲ್ಲಿ ಭಾರತ-ಆಸ್ಟ್ರೇಲಿಯಾ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದ ಜಾರಿಗೆ ಬಂತು. ಇದು 2030ರೊಳಗೆ ದ್ವಿಪಕ್ಷೀಯ ವ್ಯಾಪಾರವನ್ನು 100 ಬಿಲಿಯನ್ ಡಾಲರ್‌ಗೆ ದ್ವಿಗುಣಗೊಳಿಸುವ ಉದ್ದೇಶ ಹೊಂದಿದ ಐತಿಹಾಸಿಕ ಒಪ್ಪಂದವೆಂದು ಪರಿಗಣಿಸಲಾಗಿದೆ. ಈ ಒಪ್ಪಂದದ ಪ್ರಕಾರ, 2026ರೊಳಗೆ ಆಸ್ಟ್ರೇಲಿಯಾದ ಭಾರತದಿಂದ ಆಗುವ ಆಮದುಗಳ 100 ಪ್ರತಿಶತಕ್ಕೆ ತಕ್ಷಣದ ಸುಂಕ ರಹಿತ ಪ್ರವೇಶ ಸಿಗಲಿದೆ. ಇದೇ ವೇಳೆ ಭಾರತವು ಆಸ್ಟ್ರೇಲಿಯಾದ 85 ಪ್ರತಿಶತಕ್ಕೂ ಹೆಚ್ಚು ವಸ್ತುಗಳ ಮೇಲಿನ ಸುಂಕಗಳನ್ನು ತೆಗೆದುಹಾಕಿದೆ.

2024ರ ಮಾರ್ಚ್‌ನಲ್ಲಿ ಭಾರತ EFTA TEPA ಒಪ್ಪಂದಕ್ಕೆ ಸಹಿ ಮಾಡಿದ್ದು, ಇದು 2025ರ ಅಕ್ಟೋಬರ್ 1ರಿಂದ ಜಾರಿಗೆ ಬಂತು. ಯುರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಷನ್‌ಗೆ ಸೇರಿರುವ ಸ್ವಿಟ್ಜರ್ಲ್ಯಾಂಡ್, ನಾರ್ವೆ, ಐಸ್‌ಲ್ಯಾಂಡ್ ಮತ್ತು ಲಿಚ್ಟೆನ್‌ಸ್ಟೈನ್ ರಾಷ್ಟ್ರಗಳೊಂದಿಗೆ ಭಾರತ ಐತಿಹಾಸಿಕ ಒಪ್ಪಂದ ತಲುಪಿತು. ಇದು 15 ವರ್ಷಗಳ ಅವಧಿಯಲ್ಲಿ ಭಾರತದಲ್ಲಿ 10 ಲಕ್ಷ ನೇರ ಉದ್ಯೋಗಗಳನ್ನು ಸೃಷ್ಟಿಸುವ ಗುರಿಯೊಂದಿಗೆ, 100 ಬಿಲಿಯನ್ ಡಾಲರ್ ವಿದೇಶಿ ನೇರ ಹೂಡಿಕೆಗೆ (FDI) ಬದ್ಧತೆಯನ್ನು ಹೊಂದಿದೆ.

2025ರ ಜುಲೈನಲ್ಲಿ ಭಾರತ-ಯುಕೆ ಸಮಗ್ರ ವ್ಯಾಪಾರ ಒಪ್ಪಂದ (CETA) ಸಹಿ ಮಾಡಲಾಯಿತು. ಈ ಒಪ್ಪಂದವು ಬ್ರಿಟಿಷ್ ವಸ್ತುಗಳ ಮೇಲಿನ ಸುಂಕಗಳನ್ನು ಕಡಿತಗೊಳಿಸುವ ಮೂಲಕ ಹಾಗೂ ಭಾರತದಿಂದ ಯುಕೆಗೆ ಹೋಗುವ ಸುಮಾರು 99 ಪ್ರತಿಶತ ರಫ್ತುಗಳಿಗೆ ಸುಂಕ ಮುಕ್ತ ಪ್ರವೇಶ ನೀಡುವ ಮೂಲಕ ದ್ವಿಪಕ್ಷೀಯ ವ್ಯಾಪಾರವನ್ನು ಹೆಚ್ಚಿಸುವ ಉದ್ದೇಶ ಹೊಂದಿದೆ.

ನಂತರ 2025ರ ಡಿಸೆಂಬರ್‌ನಲ್ಲಿ ಭಾರತ-ಓಮನ್ CEPA ಸಹಿ ಮಾಡಲಾಯಿತು. ಈ ಐತಿಹಾಸಿಕ ಒಪ್ಪಂದವು ದ್ವಿಪಕ್ಷೀಯ ವ್ಯಾಪಾರವನ್ನು 10.61 ಬಿಲಿಯನ್ ಡಾಲರ್‌ಗಿಂತ ಹೆಚ್ಚು ಮಟ್ಟಕ್ಕೆ ಏರಿಸುವ ಗುರಿ ಹೊಂದಿದೆ. ಇದು ರಫ್ತು ಮೌಲ್ಯದ 99.38 ಪ್ರತಿಶತವನ್ನು ಒಳಗೊಂಡಿದ್ದು, 98.08 ಪ್ರತಿಶತ ಟ್ಯಾರಿಫ್ ವಿಭಾಗಗಳಿಗೆ ಭಾರತಕ್ಕೆ 100 ಪ್ರತಿಶತ ಸುಂಕ ರಹಿತ ಪ್ರವೇಶ ನೀಡುತ್ತದೆ.

ಭಾರತ-ಯುರೋಪಿಯನ್ ಯೂನಿಯನ್ (EU) ಮುಕ್ತ ವ್ಯಾಪಾರ ಒಪ್ಪಂದವು 2026ರ ಜನವರಿಯಲ್ಲಿ ನಡೆಯಿತು. 2027ರಲ್ಲಿ ಜಾರಿಗೆ ಬರಲಿರುವ ಈ ಒಪ್ಪಂದವು ಉತ್ಪನ್ನಗಳು, ಸೇವೆಗಳು ಹಾಗೂ ಡಿಜಿಟಲ್ ವ್ಯಾಪಾರ ಕ್ಷೇತ್ರಗಳಲ್ಲಿ ಮಹತ್ವದ ಸುಧಾರಣೆಯನ್ನು ತರುತ್ತದೆ. ಇದರಡಿ ಭಾರತದಿಂದ ಇಯು ರಾಷ್ಟ್ರಗಳಿಗೆ ಹೋಗುವ 99.5 ಪ್ರತಿಶತ ರಫ್ತುಗಳಿಗೆ ಸುಂಕ ರದ್ದುಪಡಿಸಲಾಗುತ್ತದೆ ಹಾಗೂ ಭಾರತಕ್ಕೆ ಬರುವ ಇಯು ಆಮದುಗಳ 97.5 ಪ್ರತಿಶತಕ್ಕೆ ಸುಂಕ ರಿಯಾಯಿತಿ ನೀಡಲಾಗುತ್ತದೆ.

ಕೊನೆಗೆ, 2026ರ ಫೆಬ್ರವರಿಯಲ್ಲಿ ಭಾರತ-ಅಮೆರಿಕಾ ಮಧ್ಯಂತರ ವ್ಯಾಪಾರ ಚೌಕಟ್ಟು ಘೋಷಿಸಲಾಯಿತು. ಇದು ಆರ್ಥಿಕ ಸಹಕಾರವನ್ನು ವೃದ್ಧಿಸುವುದು, ಪರಸ್ಪರ ಸುಂಕಗಳನ್ನು ಕಡಿತಗೊಳಿಸುವುದು ಹಾಗೂ ವ್ಯಾಪಾರ ಉದ್ವಿಗ್ನತೆಯನ್ನು ತಗ್ಗಿಸುವ ಉದ್ದೇಶ ಹೊಂದಿದೆ.

 ಇದರ ಪ್ರಮುಖ ಅಂಶಗಳೆಂದರೆ, ಭಾರತೀಯ ರಫ್ತುಗಳಿಗೆ ಅಮೆರಿಕಾ ಸುಂಕ ರಿಯಾಯಿತಿ ನೀಡುವುದು, ಉಕ್ಕು ಮತ್ತು ಅಲ್ಯೂಮಿನಿಯಂ ಮೇಲಿನ ಸೆಕ್ಷನ್ 232 ಶುಲ್ಕಗಳ ವಿಚಾರವನ್ನು ಪರಿಹರಿಸುವುದು; ಭಾರತವು ಅಮೆರಿಕಾದ ಕೈಗಾರಿಕಾ ಮತ್ತು ಕೃಷಿ ಉತ್ಪನ್ನಗಳ ಮೇಲಿನ ಸುಂಕಗಳನ್ನು ಕಡಿತಗೊಳಿಸುವುದು ಹಾಗೂ ಸುಂಕೇತರ ಅಡೆತಡೆಗಳನ್ನು ನಿವಾರಿಸುವುದು.

ಮತ್ತುಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ